Familia Caamagno

Familia Caamagno é un grupo de rock e garage formado en Sigüeiro a comezos dos anos 10. A súa música bebe dos clásicos deses estilos, ademais de se encamiñar cara ao blues, o punk e nos últimos discos tamén cara ao pop.

Dende a Galiza máis profunda e remota chega a Familia Caamagno disposta a manter e perpetuar as súas raíces italoamericanas. Mesturando o garaxe, o blues, a empanada de pulpo, os spaguetti bolognesa, a proba dos rixóns, o rhythm and blues, o punk, o sexo nas obras, a hixiene persoal e a extorsión con swing, pretenden facer bailar a todos os que se acheguen ás súas galas. Aínda que non queiran. 

Deste xeito se presentaba alá polo 2011 a Familia Caamagno, unha banda nada en Sigüeiro e que apostou desde o comezo polo rock e o garage.

No ano 2012 editaron os seus dous primeiros traballos, o primeiro deles de título homónimo, Familia Caamagno, e o segundo un sinxelo con 2 temas, Cantan polo Nadal!. A gravación destes dous traballos foi rexistrada ao vivo por Tomás Ageitos e a masterización correu a cargo do Doutor Chou. Remataron este ano de maneira triunfal levando o primeiro premio no Concurso de bandas da Deputación da Coruña.

No ano 2014 publicaron o disco Hai que andar cos tempos!, gravado en setembro de 2013 nos estudios analóxicos Circo Perrotti de Xixón. Neste disco combinan cinco traballo propios, entre o pop dalgunhas cancións e o rock'n'rol bailábel doutras, e a adaptación da canción "Poison Ivy" de The Coasters. O proceso de gravación foi dirixido por Jorge Explosión e editado pola discográfica compostelá Lixo Urbano en formato de disco compacto e vinilo de 12”.

O proceso de gravación nos estudios Circo Perrotti, con produción, gravación, mestura e masterización por Jorge Explosión repetiríase exactamente 2 anos despois, setembro de 2015, para Para unha vez que saímos, que sae á luz no 2016.

O 8 de abril de 2019 van publicar o seu novo traballo, Había que intentalo, de novo gravado por Jorge Explosión en Circo Perrotti.


Compoñentes

Toni Caamagno: Batería e coros

Lano Caamagno: Guitarra

Francesco Caamagno: Guitarra e coros

Jess Caamagno: Guitarra

Manuele Caamagno: Voz e saxofón

Contacto

facebook

Ao vivo no Revenidas 2015 + Entrevista


FAMILIA CAAMAGNO (Outubro 2012)


FAMILIA CAAMAGNO CANTAN POLO NADAL! (Decembro 2012)


HAI QUE ANDAR COS TEMPOS! (Febreiro 2014)


PARA UNHA VEZ QUE SAÍMOS! (Marzo 2016)