A emigración encheu o planeta de sons galegos. De entre todos eles destaca o coñecido como o máis grande gaiteiro de América, Manuel Dopazo Gontade, nado na parroquia de Manduas, Silleda, no 1882 e morto en Bos Aires no 1952. Marchou para Arxentina, a canda súa moza, fuxindo do servizo militar. Alí creou a primeira banda de gaitas coñecida, Los Gaiteros de Vilaverde. Compositor e fabricante de gaitas, afortunadamente o seu virtuosismo ficou plasmado nestas gravacións hoxe recuperadas desde os numerosos discos orixinais que gravou en 78 r.p.m.
Na actualidade, en Bandeira celébrase un Memorial Manuel Dopazo que atrae os mellores intérpretes tradicionais.