Estréase o documental 'Escuros, roncos e compasados'

O pasado 29 de xuño estreouse en Compostela o documental que repasa a escena death metal galega da década dos 90. Codirixido por Luis E. Froiz (Santiago, 1985) e Carlos Pensado (Camariñas, 1977), dous apaixonados do death galego que teñen tocado nalgunha banda do estilo, o documental dá a palabra a membros das formacións que encetaron con este xénero musical no país, algúns deles aínda en activo 20 anos despois.


O Auditorio de Galiza foi o lugar escolleito para a estrea da obra, que fai un percorrido polas bandas pioneiras do death metal galego, contra finais de década dos 80 e comezo da dos 90 do pasado século. Falan os propios protagonistas daquel movemento e cóntannos as relacións que existiron entre eles e as dificultades que pasaron para sacar adiante unha escena musical que se move por definición no underground e que practicamente é amateur en todo o mundo, agás algunha banda dos USA.

Absorbed, Dismal, os precursores S.O.K. e Detestor, Wisdom, Unnatural, etc. deixaron a súa pegada no death galaico e agora son os protagonistas deste filme que pretende botar luz sobre un movemento no que incluso os máis seareiros tiñan complicado atopar información sobre bandas ou discos.


Atención! Este sitio usa cookies e tecnoloxías similares.

Facendo click en aceptar, estás dacordo co seu emprego

Acepto