Momboi estrea novo tema, Meu Santo, na sala Sónar xunto coa banda asturiana Bisonte

• Será este sábado 16 de novembro, na Sala Sónar en Santiago de Compostela.

• As entradas están á venda na plataforma Entradium.

Santiago de Compostela, 11 de novembro, 2024. A banda compostelá Momboi estrea Meu Santo, unha nova receita que mestura ritmos latinos e galegos e que tocará en directo no concerto deste sábado 16, na Sala Sónar, ás 21.30h. Xunto con Momboi tocará a banda asturiana Bisonte. As entradas están dispoñibles na plataforma Entradium.

Momboi é unha das bandas pop-rock máis destacadas do panorama musical galego recente. Gañadores do Premio Martín Códax 2022 á mellor banda de pop polo seu álbum “Vacacións en Ornanda”, no que fusionan o folk-rock cos ritmos latinos e a tradición galega, evocando a Galicia turistificada dos anos 90. Neste concerto presentarán ademais o seu novo single, “Meu santo”, lanzado o pasado mes de outubro.

Pola súa parte, Bisonte é unha banda asturiana de pop rock, que está a piques de estrear novo proxecto despois do éxito do seus últimos traballos. A súa música parte de sons inspirados no estilo americano dos anos 70, con influencias pop rock coas que procuran un son característico propio.