Tras anos coincidindo e compartindo diversas experiencias musicais, estes tres grandes músicos deciden poñer a andar seu propio proxecto artístico, motivado pola súa recíproca admiración e amizade. Unidos ademais pola madeira dos seus instrumentos e cunha concepción musical común, funden conceptos diversos na súa viaxe musical: acústico, de raíz, improvisación, atemporal, aventura, surrealismo, gastronomía...
Eles son Quim Farinha (violino), Kin García (contrabaixo) e Pedro Pascual (acordeón diatónico. Os seus nomes están intimamente vencellados con grandes proxectos da música galega coma Berrogüetto, Marful, ou prestixiosos músicos coma Jorge Pardo, Walter White ou Steve Brown. Teñen tocado tamén con Susana Seivane, Uxía, Leilía, Xosé Manuel Budiño, Rodrigo Romaní, ...
Tras publicar o seu primeiro traballo discográfico, colectan grandes eloxios de crítica e público levando a súa música por teatros, auditorios e festivais da Península Ibérica, Bretaña, Portugal, Serbia… No mes de novembro pasado presentaron o seu novo traballo "Fake".
Os seus concertos teñen risco, improvisación e contundencia. Un grupo que non deixa a ninguén indiferente e mantén en movemento a alma e os pés.