Os grupos Galifunk Brass e Radio Cós encabezarán o cartel musical do Corazón da Artesanía. VI Encontro da Artesanía Tradicional e Popular de Galicia, que se celebrará nos Pendellos de Agolada do 7 ao 9 de xullo organizado pola Consellería de Economía, Emprego e Industria como un evento integral de divulgación e de posta en valor da artesanía e dos oficios artesáns, así como da súa interrelación con outras disciplinas artísticas.

Así, na xornada inaugural do venres 7, ás 22:30 horas, o grupo Galifunk Brass será os encargado de abrir o programa de concertos que se celebrarán na Praza do Concello de Agolada ao longo dos tres días de duración do evento. Buscando sempre ser orixinais e inspirándose nas brass band americanas, amosarán un repertorio amplo e variado, con arranxos propios e innovadores.

Xa na xornada do sábado, ás 13:00 horas a Banda Municipal de Agolada actuará na sesión vermú e ás 18:00 horas chegará a quenda do pasacalles do Grupo Bico da Balouta, tamén orixinais de Agolada. Será ás 22:30 horas cando chegue a hora de ver no escenario a Radio Cós. Tras nove anos percorrendo escenarios en Bélxica, Inglaterra, Escocia, Bretaña e Galicia, transmitindo o seu modo de entender a nosa música tradicional, en Agolada visibilizarán as cancións tradicionais de Galicia, interpretándoas e traéndoas aos nosos días sen renunciar a misturalas con outras tradicións irmás doutras partes do mundo.

Por último, na sesión vermú da xornada do domingo a Agrupación Folclórica “Cantigas e Agarimos” procedente de Santiago de Compostela actuará establecendo unha interacción moi directa e cercana co público e buscando a súa participación na festa.

O Corazón da Artesanía en Agolada converteuse nestes anos nun espazo de diálogo entre a artesanía, o deseño, a arquitectura e moda, de reflexión sobre o proceso creativo e de novas propostas sobre a interacción da artesanía no desenvolvemento do rural. Oficios tradicionais, gastronomía e música irán de novo da man nunha cita xa consolidada á que asistiron o ano pasado máis de 8000 visitantes.