Chegou o tempo das cicloxénes explosivas, das alertas vermellas por temporal e do Festival Treme a Terra. Como cada ano por estas datas, alonxadas da oferta cultural do verán, o Colectivo Terra organiza un festival que suma con esta 19 edicións. A data elexida é o sábado 8 de decembro, no aparcadoiro do IES Fragas do Eume. Desfrutaremos das actuacións de Bule, un grupo eumés que mistura o pop e o rock con melodías divertidas e pegadizas; Tanxugueiras, unha auténtica homenaxe á música tradicional galega; Bastards on Parade, que presentan novo disco e que fusionan as nosas raíces celtas co punk rock. E The Baboon Show, unhas criaturas salvaxes chegadas dende Suecia cun punk rock escandaloso baixo o brazo. Para as máis pequenas, e as que non o son tanto, ese mesmo sábado 8 de decembro poderemos gozar coa actuación de Pakolas, co seu espectáculo As Parábolas de Pakolas. Dende as 19:00h na Casa da Cultura. O 16 de decembro, tamén dentro da programación do festival, contaremos co espectáculo de Paco Nogueiras e a súa Radio Bule Bule. Será ás 12:00h na Casa da Cultura.

E si, xa van 19 edicións. Desta volta centrado na loita obreira dos asteleiros da ría de Ferrol. Nesta terra non somos periféricas nin fin de nada. As heroicas resistentes dos nosos estaleiros non eran pobres obreiras. Simples vítimas do sistema que se amedrentaron ante a presión gubernamental e policial. No S.XX houbo en Galiza numerosas expresións de loita obreira. A imaxe de submisión ou inactividade da sociedade galega é un mito que se foi construíndo ao longo dos anos. Nada máis lonxe da realidade. Nas súas batallas derramaron sangue e na memoria quedan Amador e Daniel. E tantos outros heroes da resistencia obreira. Vai por elas este traballo. Tamén por todas ás que o amianto lles secuestrou os pulmóns e a vida. Editamos con este festival un libreto onde damos conta dos acontecementos máis salientábeis desta etapa da nosa historia, cos centos de paros, folgas e conflictos que precederon ao estourido revolucionario de 1972, sen esquecernos do papel xogado polas mulleres, loitadoras e traballadoras que non respondían ao perfil de “mulleres domésticas” que quería vender o franquismo. Sodes semente revolucionaria.



Benvida ao Festival Treme a Terra. 8 de decembro. Pontedeume.