Un total de 15 grupos de música tradicional galega encherán as rúas do casco vello de Lugo no día máis emblemático das festas do San Froilán.
A Asociación de Gaiteiros Galegos organiza de novo a que será a XVI edición da Mostra de Música Tradicional do Domingo das Mozas, mostra que contará con actuacións de 15 grupos de música tradicional galega, que encherán da nosa música o casco vello da cidade o vindeiro domingo día 12 de outubro, o día máis emblemático das festas do San Froilán.
Os grupos participantes na mostra actuarán en horario de mañá e de tarde en distintas portas da muralla, prazas e rúas, de tal maneira que toda a xente que entre na cidade, sexa recibido co son da nosa musica tradicional.
Os grupos participantes son os seguintes:
Ansuiña – Vilanova de Arousa
A Regionalista - Teo
Ars Antiqua – Compostela
Caivanca – Lugo
Cuarteto Xaramolo – Lourenzá
Embruxo – Ordes
Ludovaina- Cangas do Morrazo
Os Cuncheiros – Vigo
Os de Algures – Pontevedra
Os Enxebres de Cacheiras – Cacheiras
Os Fontesuairas – A Coruña
Os Melidaos – Melide
Saiñas – Xove
Tanto nos Ten – Redondela
Zurrumalla - Vigo
Pola mañá os 15 grupos saírán dende a Praza Maior ás 11.30 horas facendo un pasarrúas polas distintas rúas do centro urbán amurallado, ata as 14:00h.
Pola tarde repetirase o itinerario de pasarrúas a partir das 17.30 horas, para logo rematar ás 19.00 horas na Praza do Campo Castelo.
Esta mostra, na que a Asociación de Gaiteiros Galegos xunta ano tras ano aos mellores grupos de gaitas de Galicia, ten como finalidade a exaltación da música tradicional galega servindo como medio de difusión para que a nosa música chegue ao maior número de xente posible.
É a única mostra deste tipo que se fai nunhas festas patronais e consegue que Lugo sexa referencia en toda Galicia, pois demostra que a nosa música tradicional pode ser a protagonista da festa na rúa.