Grupo formado por Iván Armenteros (Percusión), Francisco García (baixo e bouzuki), Daniel Domínguez (frautas e gaitas), Mayte Rodríguez (teclados), David Luís (acordeón diatónico), Rubén Armenteros (Percusión). Desde o ano 1996, data en que o grupo Noitébregos comeza a súa andaina musical, as variacións do seu estilo teñen sido de diversa índole. Nun primeiro momento a formación podía considerarse como un quinteto tradicional. Intentaron basear o seu repertorio nas pezas do cuarteto do século XIX Os Trintas de Trives, e en composicións tradicionais galegas. Tras uns anos mantendo esta tendencia, fóronse introducindo instrumentos que lle daban un carácter máis diatónico ao grupo, como un pínfano e un acordeón.
Entrando xa na última etapa, cunha sonoridade xa plenamente folk, o estilo musical mantén certos aires dos comezos fusionados coa música celta. O repertorio do grupo pode dividirse en dúas partes: as pezas instrumentais, onde podemos encontrar temas do repertorio cubano de danzóns e rumbas. E as pezas cantadas, caracterizadas por un estilo máis melódico.