"Distintos pobos, unha única loita - Hamaika herri, borroka bakarra." Baixo esta epígrafe en galego e eúscaro atopamos unha iniciativa de solidariedade internacionalista que ha xuntar Son da Rúa, Nao e os vascos Odolaren Mintzoa nunha xeira de concertos que comeza cunha festa Pre-Concerto esta quinta-feira 22 de febreiro no Avante de Compostela.
Todo vai comezar este xoves, coa Festa Pre-Concerto no Avante. Agasallos, sorpresas, licor café, sorteos... E para pór o ramo, a presentación durante a noite dunha canción que os Nao tiñan ben gardadiña. No tema colaboran SonDaRúa e as Tanxugueiras. Se aínda non tes a túa entrada para o concerto que se celebrará na Malatesta o 3 de marzo, podes levar unha de balde na festa do Avante. Se xa a mercaches, podes saír de alí con discos e camisolas, polo papo, de NAO e Odolaren Mintzoa.
3 de marzo en Compostela, na Malatesta, e 24 de marzo en Euskal Herria. Dúas únicas datas antes do verán dos Nao, para pór enriba da mesa a solidariedade internacionalista. E ao carón dos da Estrada, dúas bandas novas de enorme proxección presentando disco en Compostela o 3 de marzo: SonDaRúa e Odolaren Mintzoa.
E Nao facendo un repertorio longo feito a medida das propostas das seareiras -no seu facebook tes info- incluíndo temas de todos os nosos discos. Colaboracións moi especiais, e demais sorpresas que serán desveladas aos poucos.
En definitiva, unha festaza que non te podes perder!!!
