Mondra

Martín Mondragón, natural do concello de Teo, é un artista galego coñecido como Mondra. A pesar de comezar a súa carreira artística como bailador, desde 2023 encetou a súa andaina como cantante, con xa dous discos publicados, e converteuse nun dos referentes do novo trad galego.

Nado da na parroquia de Recesende, de menos de 500 habitantes, no concello de Teo, Mondra comezou a súa carreira profesional na compañía de danza de Fran Sieira, e a súa condición de bailador non o abandonou na súa nova faceta artística, caracterizada ao vivo por unha coidada posta en escena na que o baile ten un gran protagonismo. 

En setembro do ano 2023 editou a súa estrea discográfica, Ardén (Altafonte, 2023), disco que combina a música tradicional con sonoridades actuais, electrónica, rap,.... mestura que se converteu no sinal de identidade do novo trad do país. O traballo recibiu unha grande acollida tanto no público coma na crítica, gañando o Premio Martín Códax 2024, na categoría de electrónica. A canción 'Quererse ben' resultou ademais gañadora do premio aRi[t]mar á Mellor Música do 2024 na Galiza. A xira posterior, a Folía dos Ardentes, ultrapasou as 80 datas, tanto na Galiza coma fóra.