Cantadeiras do Berbés

Grupo de cantareiras vigués vencellado á Asociación Veciñal Casco Vello desta cidade, naceron nun curso organizado por esta asociación que impartiu Uxía Senlle, e que sacou dous discos ao mercado, A roupa do mariñeiro, (Do Cumio, 1996) e Agora cantámolas nós, (Do Cumio, 1998), traballos que son senllas escolmas de pezas cantadas populares. O grupo, que acompaña as voces das cantareiras con pandeiro, pandeiretas e outros trebellos percutivos coma piñas ou cunchas, acadou sona con facilidade, cunha proposta sinxela na feitura pero do agrado do público galego que teñen levado este fato de mulleres por abondosas romarías, festas e programas de televisión do noso país.

O seu terceiro traballo chamouse Todos a bordo e nel seguiron a rescatar vellos temas mariñeiros, cantos de taberna e outras pezas da música popular que acompañan con acordeón, percusións e gaita.