Pasaron algo máis de 5 meses do concerto presentación do disco "Vaise armar" no Mesón do Bento. E o pasado venres 12 de outubro voltamos trasladarnos á provincia da Coruña para asistir a un dos concertos desta xira, na que seguen embarcados os Zënzar. Desta vez collemos a furgo ata Laracha, para acudir ao Pub D´Antón e gozar con estes cercedenses.

Cando chegamos ao local semellaba estar medio baleiro, pero preto da media noite, pode que polos primeiros acordes que comezaban a soar, pode que por cousa da hora bruxa.... a cousa é que nun anaco estaba case a rebosar. Dende o primeiro tema a banda deixaba toda a enerxía que podía no escenario, non hai máis que velo nas súas caras, nelas séntese que o rock galego sáelles dende dentro! Que son o que mostran! Que por moito cuarto de século que pase seguen a ser os mesmos que hai anos.
A banda á par,te de seguir a presentar os temas do seu último disco como o que lle dá o nome "Vaise armar" ou "Teño unha casa no cemiterio", non esquenceu lembranos outros anteriores como poden ser "Doutor", "A raeñala", "A culpa foi de Leño", "Rastafari popular" ou "Arrastrado". Aínda que os que mostraron unha maior complicidade cos seareiros foron "a tribu" ou "o reverendo", fose como fose os asistentes coñecían todos os acordes e letras do grupo. O que demostra que xogar ao carón da casa fai que acodan ademais dos seguidores todos os amigos, o que facía que Bocixa chamase por algún dos asistentes polo seu nome. Este foi o caso de preguntar: Está por aí Carliños? Pois resultou que si estaba, e este mozo, tamén cercedense, máis coñecido como Gendebeat animouse a facer unha colaboración en “A forza da palabra”.

A pesar de que o grupo amenazaba con rematar o concerto cunha versión de “Tiven un bar” que soaba a bossanova, aínda tiveron forzas para facerlle caso o entusiasmado público e botarlle unha versión do coñecido “O tren” de Andrés Do Barro, ou “O padriño”, mitico son que ata coñecen os que cren non coñecer os Zënzar, grazas o disco recopilatorio de “A per loca”. Si, dígoo por experiencia propia e dalgúns amigos. Sexa como fose os da 1ª fila xa estaban máis enriba do escenario que embaixo cantando ao micro. Neste momento a temperatura e o alboroto do público non podia ser maior, pero como sempre ocorre…cando estas no mellor da festa remata…dá igual o que dure sempre hai un fin, e sempre nos sabe a pouco. Así que nos deixaron con “Cheira mal”que fixo que o local semellase unha revolta popular e unha versión da rancheira “Volver, volver” de Vicente Fernandez.

Por se a algún de vos tamén lle soubo a pouco, ou quedastes coas ganas, podedes velos o 19 de outubro  no Pub de Leo (Castenda da torre-Tordoia) ou o 10 de novembro na Sala Mardi Gras (A Coruña), ou se non acompañados do grupo Dr. Garimba o 3 de novembro no Pub Gales (Betanzos) ou o 7 de decembro na Sala A Reserva (Carballo).

Aquí tedes unha galería con máis de 40 fotos do concerto:

{artsexylightbox path="images/stories/2012/concertos/zenzar/dantonlaracha"carousel="true" carousel_visible="4"}{/artsexylightbox}

Texto e fotos: Lety GF