Ataque Escampe deu en Compostela, o pasado 19 de xuño, un concerto inesquecible. Foi a presentación en sociedade dos Relatos Americanos pero tamén a despedida de Alex Charlón e incluso a primeira ocasión en Santiago de escoitar ao vivo e en plenitude o Disco Vermello. Ocasión inmellorable para a estrea dun novo colaborador de GZmúsica, o Miguel Duarte. E tamén por vez primeira na nosa web, fotos de Gloria López para nos ilustrar o que deu de si o paso pola Capitol das Ataque Escampe.
Hai noites nas que saes dun concerto coa sensación de ter vivido algo que xamáis se volverá a repetir, onde se crea un vínculo especial entre as preto de 500 persoas que acudimos á Sala Capitol de Compostela. O concerto das Ataque Escampe, efectivamente, foi unha desas noites, e por moitos motivos:
Por un lado tocaba presentar en sociedade Relatos Americanos, un pequeno libro recén saído do forno que mistura as vivencias do grupo ao longo do país e collages do artista Misha Bies Golas, que xa colaborara co grupo na portada do seu último disco.
Por outro lado tamén estaba a conta pendente de presentar o Disco Vermello, a súa última achega discográfica, publicado en maio do 2014. Dende a súa saída non fixeran un concerto co formato completo en Compostela (coa excepción dun curtiño set-list na Romaría Pop 2014 baixo un sol doente ás 14:00 da tarde). Era hora de facerlle xustiza ao disco e facer unha presentación xeitosa.
Éste non era un concerto habitual das Ataque Escampe, non só se trataba de presentacións, tratábase da derradeira actuación do cantante Alex Charlón coa formación, e pese a momentos emotivos, convertíuse nunha festa de despedida inesquecible.
Abrindo o concerto estiveron The Lost Omelette-makers e Vozzyow, que se encargaron de quentar o ambiente. Coas primeiras notas de Os problema crecen comezou a encherse a sala, e un a un foron saíndo en procesión Álvaro Trillo, Lois G. Carlín, Samuel Solleiro, Miguel Mosqueira e Roi Vidal, as Ataque Escampe. Xa viñan de atrás facendo concertos coa nova formación, co outrora batería Roi Vidal á voz, que defendeu perfectamente o seu novo rol. Foron soando pezas do novo disco como Orde e progreso, Música Industrial, Street Fighter coa xente berrando ao unísono “puño americano” e algún “hadouken”, a hipnótica 2006, San Marino, Salvarei o Mundo versión cumbia. Mesmo se atreveron con algunhas rarezas como After Hours incluída no disco dos Bolechas e a coreada Maycar.
Foron soando tamén clásicos da súa discografía como Festa Malandrómica ou Noites de Agosto.
Aínda que xa deixaron o termo atrás, houbo algún momento de rock serie B nos que Tomás Ageitos, encargado do son, tivo que intervir maxistralmente. Son precisamente eses momentos os que tanto encanto lle dan á banda.
No tramo final do concerto saíu ao escenario Alex Charlón, non moi amigo de facer sangue do asunto, presentou a seguinte canción como un epitafio, Arder. O resto do concerto foi unha festa, coa xente cantando de comezo a fin pezas como A cabana do Tio Tom e Once upon a time: A Terra Chá e o kazoo de Alex botando lume.
Tras os bises de rigor, con O Longo Adeus e Misión de Audaces volveron á escena cos segundos bises, rematando coa tabernaria Vista Alegre. A xente despediu con agradecemento ao grupo e a Alex mentres soaba de fondo a canción do final de Willy Fog.
A modo persoal botei en falta Segunda División ou algunha peza de A grande Evasión, do que curiosamente non soou ningunha, aínda así non teño queixa ningunha da escolla de cancións, ardua tarefa. Concerto emotivo onde haxa. Logo fomos dereitiños ao posto dos cd´s a mercar Relatos Americanos e tras comentar a xogada, saímos da Capitol cun sorriso na cara, efectivamente, foi unha desas noites.
Aquí podedes ver máis fotos do evento (Gloria López Fotografía Artística)
TEXTO: Miguel Duarte
FOTOS: Gloria López
Set-List
1. OS PROBLEMAS CRECEN
2. ORDE E PROGRESO
3. STREET FIGHTER
------------------------------------
4. MÚSICA INDUSTRIAL
5. FESTA MALANDRÓMICA
------------------------------------
6. MAYCAR
------------------------------------
7. TECNICOLOR
8. AFTER HOURS
9. 2006
10. NOITES DE AGOSTO
------------------------------------
11. SAN MARINO
12. ARDER
------------------------------------
13. TERRA CHÁ
------------------------------------
14. SALVAREI O MUNDO
15. A VITORIA
------------------------------------
16. CABANA
*******************************
17. O LONGO ADEUS
18. MISIÓN DE AUDACES
*******************************
19. VISTA ALEGRE
}
}
}
}
}
}
}
}
}
}