Sábado 11 de maio, Couso acolleu a terceira edición do Churrasconcerto. Polo escenario montado no eido do local social desta parroquia estradense pasaron Pauliña, os John Deeres, Bastardos de Rivera e mais Impulsos Criminais. Noite de concertos e churrasco que acabou con selección musical de Lor Xanadú Picadiscos. Ambiente estupendo nunha noite á beira do Ulla da que vos traemos uns vídeos.

Contra as nove da noite comezaron a desfilar as racións de churrasco -e de empanada vegana- para a xente que desde Couso, doutras parroquias de Tabeirós e incluso desde Compostela ou O Morrazo se achegaron até a antiga escola unitaria de Couso. Fermosa paraxe -onde tamén se celebra no verán o festival As Nosas Músicas- para a celebración do III Churrasconcerto.

Ambiente estupendo nunha noitiña que parecía case de xullo, coa xente dando conta do churrasco mentres as bandas remataban as probas de son. Pouco despois das dez, Pauliña foi a encargada de encetar o concerto. Soa, apenas armada coa súa guitarra, foi debullando os temas do seu disco de estrea, De-xeneración (Xonix Records, 2018), publicado hai agora un ano.

Despois foi a quenda dos John Deeres. Xogando na casa, os de Couso puxeron enriba do escenario unhas contundentes postas de hard rock, coa calidade e o ar clásico aos que nos teñen habituados. Como novidade, a presenza de Patty Castro na voz nalgúns temas, ao carón de Ferni.

A noite quecía baixo o cuberto acaroado ao local onde montaran o escenario. Facíao a medida que a temperatura fóra comezaba a lembrar que estabamos en maio. Porén, o punk de ghalpón dos Bastardos de Rivera mantivo a xente quente. Primeira vez que mirabamos ao vivo aos de Vimianzo, dos que gostamos tanto no escenario como no terceiro tempo. 

E para pechar os concertos, a volta aos escenarios de Impulsos Criminais. A banda formada hai 11 anos na Amaía por un fato de estudantes mostrou que non lles sentou nada mal o paso do tempo e seguen a engaiolar o persoal co seu punk-rock clásico.


Utilizamos cookies

Utilizamos cookies no noso sitio web. Algunhas delas son esenciais para o funcionamento do sitio, mentres que outras axúdannos a mellorar este sitio e a experiencia do usuario (cookies de seguimento). Podes decidir por ti mesm@ se queres permitires o uso de cookies ou non. Ten en conta que, se as rexeitares, é posíbel que non poidas utilizar todas as funcións do sitio.