A nena e o grilo nun barquiño

Estreamos nova sección en GZmúsica. A editora e experta en literatura infantil e xuvenil Paula Fernández, -colaboradora habitual de varios medios do país-, achegará puntualmente críticas sobre as novidades musicais enfocadas ás e aos pequerrechos. E a nova sección comeza cunha fermosa obra, A nena e o grilo nun barquiño, un libro e un CD de Magín Blanco para Fol Música que se converte nunha magnífica porta de entrada á música de noso para os máis novos.


A nena e o grilo nun barquiño é unha completa obra para nenos; un conto, o dunha nena e un grilo que, baixo a pluma de Magín Blanco, emprenden unha viaxe iniciática a bordo dun pequeno barco, na que correrán aventuras e abrirán as súas mentes grazas ás novas experiencias vividas; trece actividades didácticas que converten o libro nun elemento lúdico capaz de converter os lectores e lectoras en artistas que crean; unhas ilustracións, a dun artista das artes plásticas, Leandro Lamas, convertidas nun agasallo para a vista de quen pasea polas páxinas do relato; e un CD, con trece pistas, unha para cada capítulo, que gardan as composicións que Magín Blanco preparou, e que son a parte máis lírica deste traballo e unha proba que nos dá credibilidade aos que pensamos, totalmente convencidos, que a música infantil non ten por que ser idiotizante nin estar afastada da que se vén considerando de adultos.
Estes últimos son trece temas actuais que lembran o pop da década dos 80 aderezados tamén con rock, e folc de noso que, igual que o libro, inciden en temas e valores actuais como o respecto pola natureza, a solidariedade ou a curiosidade e o interese por descubrir o mundo que nos rodea.
“Don Ramón”, a peza introdutoria, é un inocente xogo onomatopeico cun gran simbolismo na escolla do personaxe principal, un bibliotecario presentado como un ser necesario, o garda dos contos e os seus personaxes. Tras esta marabilla simbólica, a balada “Voga, voga” e “Todos somos capitáns” animan a viaxar e a construír coa imaxinación. O pop surrealista de “ A formiga Lúa” convéncenos de que as cousas non son o que parecen en clave de conto. “Meu amor estoupa” e “María e a poesía” condúcennos da man da lírica a “Happy” e, con este tema en inglés, á fusión entre o pop e o folc tinguido de reminiscencias irlandesas para despois chegar ao rock and roll, ás ansias dun dragón por se converter nunha estrela do rock. Unha xoia este “Rocanrol dragón” que referencia clásicos galegos como Siniestro Total ou internacionais como Little Richard. Continúa o disco con tres temas-homenaxe aos xogos da linguaxe que apaixonan os nenos, adiviñas, trabalinguas e outra vez as onomatopeas. E, finalmente, “A nana da avoa” e “Soñar” un arrolo e un tema ao ritmo da bossa-nova que pecha o traballo compositivo deixando un sabor doce e agarimoso.
O conxunto resulta intelixente e brillante, sen dúbida unha iniciativa pola que cómpre felicitar a Fol e animala a achegar máis traballos coma este aos seus proxectos.

O vindeiro 16 de xullo estréase o videoclip de "Rocanrol Dragón", un dos temas deste libro-disco. Velaquí o tráiler.

Texto: Paula Fernández

{fcomments}

Atención! Este sitio usa cookies e tecnoloxías similares.

Facendo click en aceptar, estás dacordo co seu emprego

Acepto