Os Xogos musicais de Luís Prego

Estes Xogos musicais de Luís Prego veñen contribuír nun campo que aínda está por encher en galego, porque se ben é certo que o noso patrimonio inmaterial, no que a cantigas e xogos infantís se refire, é enorme, non o é tanto o número de publicacións que lles facilitan aos pais e ás nais o acceso ou o achegamento a algo fundamental nos primeiros anos das crianzas: a música. Na introdución deste libro-disco Prego é moi claro con esta cuestión, e afirma categoricamente que, ao ser nos primeiros anos de vida cando se comeza a formar a personalidade do individuo, a música ten que desempeñar un papel fundamental.


É un libro-disco con xogos iniciáticos, bailes e cantigas con letras e músicas moi doadas de reproducir, 38 temas incluídos no disco, que se reparten en oito grupos segundo sexa o seu tema e a súa finalidade: Arrolos; Esquema corporal; Xogar cos dedos da man; Cantigas e recitados para quecer o corpo e aloumiñar; Xogos no colo; Os números e as letras; Os animais; Cantigas recitados e contiños; Xogos en movemento e Xogos para bailar e moverse ao compás.
Os arrolos, recollidos da tradición oral de noso, teñen en conta os pais con poucas habilidades vocálicas, e anímase a que interpreten pezas como “Aí vén Pedro O Chosco” ou “Arrorró, meu neno”. No segundo grupo, Esquema corporal, o autor escolleu cantigas coas que a rapazada poida aprender o nome das partes do corpo e que poidan traballar tamén a mobilidade. Continúase con xogos que pretenden facer pasar un momento divertido a base de recitados para aprender os nom
es dos dedos, os números e as letras ou xogos nos que cantamos mentres temos o neno no colo e o movemos con máis ou menos brusquidade, segundo a idade. As cantigas e os xogos de animais ofrecen moitas posibilidades porque poden ser acompañadas de monicreques ou simplemente recorrer a elas cando vexamos algún deses animais pola rúa. Os pequenos recitados aos que, por exemplo, acudimos cando alguén salouca ou tose tamén teñen aquí o seu oco. E, finalmente, xogos para moverse con todo o corpo, os que traballan a motricidade e fomentan a participación de varios nenos xuntos.
Sen dúbida é un bo material didáctico, pero alén desta faceta máis pedagóxica é tamén un excelente recurso para que pais e fillos gocen cos xogos e as cantigas de sempre, axudando a entender estes materiais como algo fundamentalmente lúdico.
Unha escolma que vén avalada por Luís Prego (Vigo, 1971), músico, bailador, estudoso e investigador, fundador do grupo O Fiadeiro e membro do grupo de música folc Ardentía, que lle pon a voz a todas as músicas deste traballo, ademáis do acordeón e as percusións.
Álvaro Iglesias axuda nas voces e achega percusións, contrabaixo e bouzuki nun traballo onde tamén colaboraron Roberto Cendón, Xosé Liz, Cristobal Pascual, Bea Díaz e María Prego.

Aquí tedes unha pequena mostra desta obra:


Texto: Paula Fernández

{fcomments}

Atención! Este sitio usa cookies e tecnoloxías similares.

Facendo click en aceptar, estás dacordo co seu emprego

Acepto