O artista viveirense publicou o pasado 10 de xuño o seu novo EP, 6 a.m.ORES, un traballo composto por seis cancións no que experimenta con ritmos novidosos no seu repertorio, afastándose lixeiramente dun estilo até agora máis vencellado ao hip-hop, para demostrar a súa versatilidade artística e abrir unha nova etapa musical. No proxecto colaboran artistas coma Kid Mount, Yuly, LANASA ou Rodro.

Cada canción aborda o amor desde unha perspectiva diferente, abranguendo dende o romántico até o máis íntimo e visceral. Deste xeito, o EP convértese nunha oda ás emocións, ás relacións e ás sensacións que xorden arredor dos romances e das conexións humanas.

No que atinxe ás colaboracións, Kid Mount volve facer unha aparición salientable para achegar a faceta máis urbana do EP, nun tema de trap que cumpre con creces as expectativas xeradas tras o éxito da súa anterior colaboración, Lágrimas nun bote. Por outra banda, a colaboración con Joel e Dani, do dúo LANASA, achega frescura ao conxunto do traballo cun tema cunha sonoridade máis dinámica, mantendo a liña temática do romance
presente en todo o proxecto.

En canto á produción, o EP conta co traballo de Yuly, Rodro e Sky J, encargados de dar forma ás distintas sonoridades presentes no proxecto, combinando influencias da escena urbana galega e estatal. Pola súa banda, Peter Petrowski encárgase da mestura e masterización do traballo, achegando cohesión e personalidade sonora ao conxunto do EP.

Como o propio cantante comenta: “6 a.m.ORES fala sobre seis historias de amor escritas de madrugada, nas horas nas que todos somos máis vulnerables e cando inevitablemente pensamos no que nos quita o sono. Creo que estas cancións pertencen á noite e gustaríame que tamén se escoitasen nela. É un proxecto moi persoal no que quixen explorar novas formas de expresar emocións e experimentar con sons diferentes aos que viña facendo ata agora”.
6 a.m.ORES marca un antes e un despois na carreira musical de xmaseda65: os novos sons, os ritmos explorados e a marcada estética visual do proxecto abren a porta a unha etapa máis madura, ambiciosa e experimental dentro da súa traxectoria.

O EP pode ser escoitado xa en todas as plataformas dixitais desde o 10 de xuño. Se nunca escoitaches nada de xmaseda65, aquí che queda o clip de 'Crer que me ques', -a colabo con Kid Mount- subido á rede hai apenas un mes para que descubras un dos nomes propios da nova música urbana galega.