O vindeiro venres 19 de abril GZmúsica TV emitirá un programa especial dedicado á Festa de Aniversario que celebramos o pasado sábado no Salason de Cangas. Poderedes ver o concerto que Zënzar e O Sonoro Maxín nos regalaron ao cento de persoas que nos reunimos aló. Aquí vos deixamos a crónica totalmente imparcial e a promo do programa desta sexta feira.
Foi bonito. Pasámolo moi ben. Algúns mellor ca outros, pois até o día da festa Martín, Xián, Adrián e Berto -aka Borneira Audiovisual- ou o Xabicas traballaron a eito, e cremos que todas as persoas que se achegaron até o Salaron tamén gozaron cos concertazos de Zënzar e O Sonoro Maxín.
Tratábase diso, en definitiva. De pasar unha boa noite arredor da música do país, para festexarmos tod@s o primeiro ano de vida de GZmúsica. Malia a premura de tempo marcada pola política cultural galega e estatal, -non é outra cousa-, que impón todos os atrancos para o normal desenvolvemento das manifestacións culturais do país e nos quer converter en consumidores de cultura importada. Podían aprender dos británicos.
Porén, a limitación de tempo fixo que as dúas bandas comprimisen os seus repertorios, -para se axustaren á hora e moi pouco da que dispuñan-, e o resultado foi sorprendente. É certo que tod@s, bandas e público, quedamos con ganas de un bocadiño máis pero os dous concertos, na miña opinión, quedan entre os mellores que lles teño visto ás dúas bandas. Zënzar pagou o pato decibélico e abriu a noite, moi cedo, non eran nin as dez da noite, e coa sala aínda a medio encher. Mais contan con argumentos para se adaptar e remataron quentando o Salason, xa coas máis de cen persoas que asistiron no interior da sala, na metade final do seu concerto. Díxoo un integrante do Sonoro Maxín: -Que ben soan e que clase teñen!
Enfrontar unha banda con 25 anos de traxectoria a un concerto de 70 minutos implica unha sucesión de temas moi coñecidos e, grazas á raiba que manteñen Zënzar e mais ás colaboracións que engaden frescura, o percorrido foi impresionante. Levan tempo soando moi ben e ademais as achegas de Ares á gaita, Lydia no acordeón e voz ou Xenderal rapeando acomódanse cada vez mellor.
E despois O Sonoro Maxín saíu no momento xusto a facer o concerto preciso. A xente aceptou o troco do rock pola cumbia e a Galiza tropical que fora quecendo cos Zënzar estoupou de vez. Bailamos, suamos e tamén chimpamos coa sempre poderosa traca final do Sonoro, que rematou cun Likor do negro café que todo o mundo cantou. Igual ca o Cheira mal co que acabou Zënzar. Festa e reivindicación. Aínda que desta volta, especialmente na picada de música galega posterior no Guerrilla Rock Rap Bar, houbo máis da primeira.
Este venres poderedes ver en Vía TV e en streamming os dous concertos en GZmúsica TV. Teoricamente ás 24h, iremos informando no Facebook e no Twitter da hora precisa. E o luns 22 subirémolo á rede.
Deixámosvos a promo!
Texto: lavesedo
Fotos: Xabicas
Podes velas todas na súa Páxina de Facebook.
Video: Borneira Audiovisual
{fcomments}
}
}
}
}
}
}
}
}
}