O pasado venres 12 de xuño cruzamos o país de sul a norte para nos achegar até o Momento Coruñento, xuntanza argallada no Club do Mar de San Amaro arredor do concerto de Trapallada, Os Diplomáticos e Bastards on Parade. O mellor do rock coruñés xunto nunha xornada emotiva. Camisolas do Dépor, polbo do Fiúza e cántigas a San Amaro e Monte-Alto. Na Coruña de rachí nunha noite máxica.
Chegamos xustiños para tomarlle unha de polbo no Fiúza e entrarmos para ver os Trapallada. Abriron aínda de día e con pouca xente, -era sexta-feira e case hora de estar no traballo-, mais acabaron coa pista de Club do Mar practicamente chea e cos incondicionais cantando os seus temas de ska combativo.
{artsexylightbox picasaUser="108444696226697831003" picasaAlbum="trapallada"carousel="true" carousel_visible="4"}{/artsexylightbox}
En rematando os primeiros, tocoulles a quenda aos Diplomáticos de Monte Alto. Entre apertas con amizades, bicos a señoras maiores e fotos con cativiños, os membros da histórica formación coruñenta foron indo cara ao escenario. Respirábase un aquel de noite histórica, -era apenas a segunda vez que tocaban na cidade desde que decidiron "reaparecer" fugazmente-, e a emoción chegaba tanto aos veteráns que tentaban pasar desapercibidos na retagarda coma á mocidade das primeiras fileiras. E certamente, as verbas salferidas de emoción e coa grandilocuencia habitual do Souto axudaban a agrandar a catarse colectiva. Apuntábanolo un gaiteiro, -que ademais o coñece ben-, antes de comezar: Fala co Xurxo aquí en San Amaro, pódeche contar a historia de cada pedra deste mar, de cada casa, de cada reviravolta dun camiño. Así foi transcorrendo o concerto, cun público entregado cantando de comezo a fin cada tema e bailando sen acougo. Porén, e malia a festa colectiva, aos Diplomáticos nótaselles o tempo de inactividade e por veces a cousa renxeu un bocado. Mais cando a ledicia alaga o peito, esas cousas son pataca miúda.
{artsexylightbox picasaUser="108444696226697831003" picasaAlbum="diplomaticosnomc"carousel="true" carousel_visible="4"}{/artsexylightbox}
Despois, e tamén con menos público, pois moita xente decidiu marchar cando remataron os de Monte Alto, foi o momento dos Bastards. Persoalmente, non podo negar que son un grupo que me gusta moito, pero ademais neste Momento Coruñento a banda de celtic punk deu un dos mellores concertos que lles teño visto. Quizais foi por estar na casa, quizais polas comodidades dun backstage de luxo e sofás de coiro. Probablemente, polas moitas horas de ensaio e de escenario que levan. O conto é que deron un concerto espectacular, cheo de potencia, sen baixar o pistón nin un minuto e con moitísima complicidade cos e coas que bailabamos no torreiro.
{artsexylightbox picasaUser="108444696226697831003" picasaAlbum="bastardsnomc"carousel="true" carousel_visible="4"}{/artsexylightbox}
E máis nada. Derradeira ollada á Torre antes de coller o coche de volta e dúas horas de estrada até O Morrazo, co corazón unha migalla máis coruñento que canto saímos en ruta.
Texto, fotos e vídeo: Lavesedo
{fcomments}
}
}
}
}
}
}
}