No Lebor Gábala Érenn, o Libro das Invasión que recolle as lendas da fundación de Irlanda, fálase da ben coñecida lenda de Breogán, o fundador da nación céltica galega, que construíu unha xigantesca torre en Brigantium desde a que o seu fillo Ith albiscou Irlanda e decidiu conquistar aquela illa verde. Porén, e menos coñecida a continuación da historia, que conta como despois da morte de Ith a mans dos Tuatha De Dánann e da volta do seu cadáver a Galiza, o seu sobriño Mil e seus homes, os milesios, embarcaron cara a Irlanda e venceron os Tuatha De, confinándoos ao subsolo irlandés onde aínda moran hoxe, converténdose deste xeito Mil e os seus fillos nos devanceiros dos actuais habitantes de Eire.
Desta lenda tomou o nome a banda luguesa Milesios nacida no 2009 cando un grupo de amigos se xunta para pór a nota tradicional no Penela Rock de Monforte. Unidos pola súa afección ás músicas galega e irlandesa, editan en febreiro de 2013 o seu disco de estrea, Alén mar. 4 anos despois presentan o seu segundo disco, Indoevindo gravado, mesturado e masterizado en Abrigueiro Estudios por Arturo Vaquero. O traballo continúa a explorar as relacións entre a música galega e irlandesa con pezas que beben de ambas tradicións e outras de composición propia.
A principal mudanza deste traballo respecto ao anterior é a incorporación da voz en catro das pezas. Tres destas pezas son adaptacións de cantos tradicionais e na cuarta, Milesios pon música ao poema Anceio, publicado en 1954 por Manuel María dentro do libro Advento.
O novo traballo de Milesios componse de 11 temas que queren ser un concerto itinerante. Despois destes once temas que conforman o concerto, atoparedes unha paisaxe sonora, creada sobre unha idea de Daniel Díaz, que evoca o noso ir e vir cotián e contén os ecos do concerto recén escoitado. Para finalizar o concerto, ofrécennos unhas xotas de propina. E como non hai xota sen muiñeira, tamén atoparedes unhas muiñeiras para rematar bailando.
En total, o CD contén case unha hora de música que se insire nas paisaxes que se repiten, sempre distintas, indo e vindo, das fotografías de Daniel Díaz Trigo.
Os Milesios son:
Maite Veiga: voz, percusións, baixo.
Marta Portela: voz, pandeireta, e outras percusións.
Manuel Mª Veiga: bouzouki, mandolina, frautas, clarinete, gaita, acordeón, guitarra,
baixo.
Manuel do Moucheiro: guitarra, bodhrán.
Noelia Fersán: gaitas, frautas, percusións.
Paula Veiga: violín, mandolina.
Senén Montero: acordeón, tamboril, batería, bodhrán, gadaña e outras percusións.
Aquí che queda o seu novo disco:
{fcomments}
}
}
}
}
}
}
}