Aínda resoan nas montañas do Macizo Central os últimos acordes da grande festa que foi A Rebusca de Outono 2015 e xa vos traemos a GZmúsica o impresionante traballo que fixeron Martín Rodas e Isaac Pazos por aló. Tres vídeos que resumen o acontecido venres á noite, sábado á tarde e sábado á noite máis unha crónica dos nosos reporteiros-furgoneteiros preferidos. Que vos preste!


Un ano máis voltamos á Rebusca, un festival ao que, se vas, volves seguro. Eran xa as sete cando saímos desde Vigo –cousas do choio- para 3 horas máis tarde poñernos a pé de festa.

Aparcamos a furgo e lume para os concertos, aquí vos queda o vídeo resumo dos grupos que montaron a festa na noite do venres.

 

Unha gran noite pero xa cansos marchamos antes dos picadiscos agardando descansar... iso ata ás oito da mañá cando un ritmo arrepiante de metalófono tocando a mesma melodía en bucle durante horas nos impediu conciliar o sono. De feito ata saímos a ver se era algún teléfono cun politono que se perdera ao ir mexar. Cousas dos pesnegros... teñen un aguante que non é deste mundo.

A seguinte parada facémola xa a tarde do sábado cunha sesión infantil con Cé, reitero INFANTIL, que fixo as delicias de todos os asistentes, incluídos nós e os Spin Te Kú que estaban alí dándoo todo en primeira fila detrás dos nenos. Despois tocou o turno de Blues do País.

 

 Quedounos un pouquiño de tempo para falar con amigos e dar unha volta, o tempo voa. Cea e concertos de volta. Que aínda queda festa abondo. Mellor velo que explicalo, todos os grupos estiveron ao nivel e como non, o público festivaleiro animadísimo! Sorpresa para nós Spin Te Kú que non os coñeciamos e case nin chegamos a gravalos, quedáronnos ganas doutro concerto!!

 

E ata aquí durou a nosa noite xa que co ritmo trepidante do metalófono non descansáramos ben e tocaba facelo agora. Ata outra Manzaneda, ata o vindeiro ano A Rebusca.

Vídeos e crónica: Martín Rodas & Isaac Pazos

{fcomments}



Utilizamos cookies

Utilizamos cookies no noso sitio web. Algunhas delas son esenciais para o funcionamento do sitio, mentres que outras axúdannos a mellorar este sitio e a experiencia do usuario (cookies de seguimento). Podes decidir por ti mesm@ se queres permitires o uso de cookies ou non. Ten en conta que, se as rexeitares, é posíbel que non poidas utilizar todas as funcións do sitio.