Mércores 22 de xullo, Xabier Díaz e as Adufeiras de Salitre fixeron a súa presentación na praza da Quintana de Compostela. Única ocasión de ollar ao vivo este novo proxecto até que no outono publiquen o seu disco de estrea e fagan xira polos teatros do país. Aló estivo o Miguel Duarte, que agora nos achega crónica do primeiro estalo dun proxecto que de certo vai ser unha das grandes novidades deste ano na música galega.
O pasado mércores 22 de xullo, Xabier Diaz presentou o seu novo proxecto coas Adufeiras de Salitre nun marco inmellorable: a compostelá praza da Quintana ateigada de xente que acudiu ao Certame Folk, celebrado nas festas do Apóstolo no que tamén había unha mostra de artesanía e actuacións de Magin Blanco, Cantigas e Agarimos, Tis Che Tein e Pepe Vaamonde Grupo. Esta sería a única data do verán na que veriamos o Xabier coas Adufeiras, xa que ata outubro non sairá The Tambourine Man, o seu novo disco, do que fará a súa correspondente xira-presentación polos teatros do país. Todo isto fixo que se formase unha grande expectación ao redor do concerto.
Con bastante puntualidade, ás 20:05h saíu o ex-Berrogüetto Anxo Pintos a presentar o seu vello compañeiro de banda e acto seguido saíron as dez adufeiras (Lidia Sanmartín, Iria Penabad, Noemí Basanta, Bea Mariño, Carolina Vázquez, Maite López, Cristina Pico, Mariña García, Montse García e Mariña García) vestidas de elegante negro e armadas cos adufes (pandeiros cadrados), pandeiretas e cunchas. Comezaron botándolle un par de pezas tradicionais elas soas. Logo saíu a escena Xabier co seu pandeiro e arroupado polos irmáns Gutier e Javier Álvarez, que se encargaron da zanfona, violín e do acordeón diatónico respectivamente.
Co saúdo inicial aos composteláns e visitantes da cidade, Xabier foi presentando unha a unha as pezas do seu novo disco, unhas cancións de caracter tradicional, pero vestidas dunha atmósfera íntima, máxica e hipnótica por momentos, na que a percusión cobra gran protagonismo. Coa presentación de Cantiga da Montaña, o adianto do disco en forma de videoclip, Xabier convidou a xente a facer palmas. Ao ser un concerto no que aínda brillaba o sol, atopabamos un público do máis diverso, dende xente nova a pais cos nenos pequenos. Todos se deixaron contaxiar pola maxia da música, deixándonos momentos no que se formaron simultaneamente 5 ou 6 rodas de xente bailando ao longo de toda a praza da Quintana.
A nova banda, na que se reivindica a figura da muller e do adufe, despedíuse baixo unha Quintana xenerosa cos aplausos, deixándonos a todos con ganas de máis, aínda que toca agardar con paciencia ata outubro para escoitar as pezas de The Tambourine Man, un disco que dende logo dará que falar.
Xabier Díaz & Adufeiras de Salitre - Cantiga de montaña
{fcomments}