O disco Magnético Zen, de Xoán Curiel, foi distinguido co premio ao mellor álbum en galego nos V Premios da Música Independente. «É un momento importante na miña carreira», apunta o artista, que describe o galardón como «recoñecemento ao traballo duro de varios anos» e agradece tanto a distinción como o labor dos artistas que colaboraron con el e fixeron posible o traballo. Estes premios, de ámbito estatal, entrégaos a Unión Fonográfica Independente, entidade constituída hai xa unha década para representar a produción fonográfica diante das institucións e organismos de todo o mundo. No apartado de mellor disco galego do ano, alén do de Curiel había outros traballos como os de Terbutalina, Uxía, Sérgio Tannus ou Telephones Rouges.
No ano 1998, Fame Neghra sacaba o seu primeiro LP, O neno carburador, gravado a comezos dese ano nos estudios Fussión de Vigo. 15 temas que camiñan entre o punk-rock que practicaba a banda na altura, o power pop e o garage cara ao que camiñarían despois os seus integrantes noutros proxectos como Samesugas e The Homens e o hardcore das primeiras maquetas dos propios Fame Neghra. Agora, 15 anos despois, Lixo Urbano subiu ao seu bandcamp este disco, referencia inexcusable do rock galego de finais do século XX. Escóitao no interior do artigo.
Ler máis: Lixo Urbano sobe á rede "O neno carburador", de Fame Neghra
O novo traballo dos do Barbanza, Jard Rock con Fe, será presentado na mesma sala de Ordes onde reapareceron o anos pasado. Despois do regreso triunfal do 2012, comezado co histórico concerto de volta na LP-45, Heredeiros da Crus decidiu entrar no estudio para gravar o que será o seu noveno traballo, do que xa podes escoitar un adianto, A Duquesa de Poi. O traballo completo, á venda o mesmo día que se ha presentar en Ordes, o 24 de maio.
Ler máis: Heredeiros presentan novo disco o 24 de maio na LP-45 de Ordes
A banda máis festeira do Morrazo volve estar activa. A Tuna Rastafari, despois de dous anos de parón, volveu coller os aparellos e prepara novo disco e xira para este verán. A estrea da nova xeira da Tuna será o 22 de xuño cun concerto en Cangas. Entrementres, van ir apresentando o seu novo material. Aquí vos queda a primeira canción desta nova Tuna. Unha ranchera na liña dos temas máis coñecidos da Tuna, cantada desta volta en castelán: La Reina de Saba. Accede ao artigo para a escoitares!