O 1 de abril é o día das brincadeiras na Europa Atlántica. The fools' day. O día en que os burros van onde non deben ir. E nós, -aínda que mude o clima e Azúcar Moreno non paren de tocar na Luar-, sómosche atlánticos. E estamos un chisco tol@s, así que decidimos botar a andar este proxecto o 1 de abril de 2012. Pasaron 9 meses e un monte de cousas desde aquela. Aquí tes un resumo do que foi o 2012 para GZmusica.com
Cancións de amor e liberdade. Así se chama o terceiro traballo de estudio da banda. E está a ser gravado nos Estudios Mafia do Carballiño. Os Nao pretenden ter o traballo listo e editado o 26 de febreiro de 2013 e comezar unha xira de presentación polo país en marzo dese ano. Mais para dar feito todo isto, piden a axuda de tod@s para recadar os fondos precisos.
Ler máis: Nao bota man do crowfounding para sacar o seu terceiro disco
Como xa vos contamos, os Zënzar serán unha das bandas que poderedes ver no mes de xaneiro en Tolemias. Concretamente, o seu concerto no Festigal do 2012. Aquí vos queda un petisco dese gran concerto dos de Cerceda na capital do país o pasado 24 de xullo.
GZmúsica segue coas melloras e agora tócalle a quenda ao cartafol. Ao longo desta semana todos os discos que estaban dispoñibles para escoitar e descargar en Komunikando.net, -e que xa non son accesibles nesa web-, han pasar a engrosar o noso cartafol. Chegamos a un acordo cos responsables da histórica web de referencia da música galega, www.komunikando.net, e os 75 álbums que tiña na súa base de datos van pasar a formar parte de GZmúsica. Komunikando.net segue activa e mantén outros contidos na rede, como a webserie 'Non saímos do lixo'.
Ler máis: A música de Komunikando.net, agora no Cartafol de GZmúsica

A xente de Ataque Escampe, DasKapital e A Magnifique Band dos Homes sen Medo decidiron unir esforzos no proxecto Discos da máquina. Non é un selo discográfico, non é un chiringuito nin unha ONG. Non é un proxecto pechado nin tampouco totalmente aberto. É unha solución non profesional alicerzada na autoxestión e na creatividade común, coa que grupos musicais buscan poder seguir a facer o traballo creativo con independencia. O 22 de decembro presentan na Capitol o proxecto, cun concerto das 3 bandas.
En GZmúsica tivemos a honra de colaborar co proxecto de crowfounding de Fernando Barroso e Luis Peixoto, Pop, que felizmente chegou a bo porto coas achegas de 217 mecenas que, -igual ca nós-, contribuíron até un total de 4.901€ no financiamento deste disco. Hoxe na nosa caixa do correo tiñamos a ligazón para a descarga da versión dixital do traballo e nuns días, -cando o estrambótico carteiro da nosa parroquia queira-, teremos tamén a versión física do disco. Por certo, Peixoto&Barroso estarán apresentando o traballo a vindeira terza feira 19 de decembro na Regueifa de Vigo ás 19h, e tocarán un par de temas ao vivo.
Axiña vos falaremos máis do traballo...só podemos dicir que GUSTAMOS moito da primeira escoita!