Discos

Milesios apresentan segundo traballo, Indoevindo (2017). Unha nova viaxe, velaí o nome, entre as músicas tradicionais galega e irlandesa. Os netos de Breogán sacan este segundo traballo 4 anos xustos despois da súa estrea Alén mar, tamén inspirada no folclore das dúas nacións celtas. Pégalle unha escoita!

Ataque Escampe vén de subir ao seu bandcamp o seu novo disco, Primeiros bicos (Discos da Máquina, 2017). Só escoitaramos "Papá Borracho" e "Alan Lomax" e xa deveciamos por darlle unha escoita ao resto do disco, seguro que vós tamén. Aquí o está. Tedes dez días para aprender as letras e ir cantar con elas na presentación do traballo, o 24 deste mes na Capitol de Santiago xunto a Emilio José.

Labregxs do Tempo dos Sputniks darán na Candeloria o seu penúltimo concerto. A despedida será o 1 de abril, na sala MalaTesta de Compostela. Para as que non imos poder ir até Santiago, o concerto deste sábado na sesión vermú vai ser a derradeira vez de podermos gozar con este trío estraño e marabilloso, no que confluíron durante dez anos estilos musicais e sensibilidades tan diversas como as que poden ter o Leo, Bolboreta e García Mc. Para o consolo só nos vai quedar Libremente, o disco que publicaron o ano pasado.

Talabarte publicou en novembro do ano pasado o seu segundo traballo, Fake. En formato CD+Libro, e cinco anos despois da súa estrea, o traballo reúne a música de Talabarte, os debuxos de P. Pastor e os textos de Carlos Meixide para nos propor unha viaxe a través de músicas e historias do folk europeo e americano. Falámosvos del un pouco e aínda que non poidamos gozar de textos e debuxos, si podemos escoitar tamén os 12 temas de Fake.

O pasado venres 4 de novembro púñase á venda o novo disco de Guadi Galego, O mundo está parado (Fol Música, 2016). Dispoñible para a escoita en plataformas dixitais como Spotify, Deezer ou iTunes, houbo á venda nas tendas unha edición limitada -da que non sabemos se aínda quedan existencias- feita en vinilo+CD e agora a convencional só en CD. Debullamos o marabilloso novo traballo de Galego, que podes escoitar tamén no artigo.

Acaba o 2016 e aínda temos unha morea de discos de grupos galegos da que vos falar. Eis o que nos pareceu o novo traballo de Linho de Cuco, publicado na primavera deste ano que está a rematar. Os dezaos fan unha viaxe á tradición, mais fuxindo de nostalxias e de cheiros a naftalina para nola apresentar anovada neste seu cuarto traballo. E coma sempre, non quedes coa nosa impresión, bótalle unha escoitada ao disco no artigo e tira as túas conclusións!

Secho y los invisibles seguen metidos de cheo na pequena xira de presentación de "Xa fai un tempo", o seu disco de estrea. Andaron no mes de novembro pola Coruña, Vigo, Compostela e Melide e van estar en decembro na Arca da Noe en Vilar de Santos e mais na sala A Real de Aguiño. Falámosvos un pouco deste disco e de paso deixámosvolo para que lle peguedes unha escoita.  

Zurrumalla presentou este ano o seu novo traballo, Camiño por ti (Inquedanzas Sonoras, 2016), o segundo paso por un estudio de gravación nos seus xa 16 anos de historia. Cinco anos despois do seu primeiro disco, o duplo O que había…e o que hai (Inquedanzas Sonoras, 2011), onde sintetizaban a andaina do grupos nos seus –na altura- 11 anos de vida, chega a segunda proposta deste sexteto vigués de música tradicional. Dámoslle unha voltiña ao disco e de paso aproveitamos para gozar de volta co videoclip da "Rumba do Titanis", un dos temas incluídos neste seu segundo traballo.

Onte, 17 de xullo de 2016, fixo 18 anos Filipe Xoán Froilán de Todos os Santos de Marichalar e Borbón. O Froilán, fillo da duquesa de Lugo, Helena de Borbón, e do grande Marichalar. O enfant terrible da terrible monarquía mais para moitas e moitos -do Partido Froilanista- único e lexítimo herdeiro da coroa do reino de Galiza. Para celebrar a maioría de idade -nominal, das súas capacidades e madurez reais non podemos dar constancia-, o Puto Coro do Exército Froilanista presenta a súa estrea discográfica. O seu Black Álbum, un disco mouro que fará as delicias de punks e republicanos mais do que se deben afastar as mentes delicadas, ben pensantes e monárquicas, que tamén as hai. Pasen e escoiten, antes de que algún xuíz ocioso decida prohibilo.

Hai dous meses, Nao presentou novo material. Dous EPs, Soñar e Crear, que supoñen probablemente o penúltimo paso polos estudios da banda da Estrada, inmersa na derradeira etapa da súa prolífica historia. Afortunadamente, haberá moitas ocasións de ollalos ao vivo este verán. A primeira, este sábado 8 en Ordes, no Xiana Festival, e posteriormente o 24 de xullo, por partida dobre -á tarde e mais á noite- dentro dos distintos actos que se organizan en Compostela polo Día da Patria. Mentres facedes tempos por estes concertos, non deixedes de escoitar os novos discos e ler a nosa crítica.

Utilizamos cookies

Utilizamos cookies no noso sitio web. Algunhas delas son esenciais para o funcionamento do sitio, mentres que outras axúdannos a mellorar este sitio e a experiencia do usuario (cookies de seguimento). Podes decidir por ti mesm@ se queres permitires o uso de cookies ou non. Ten en conta que, se as rexeitares, é posíbel que non poidas utilizar todas as funcións do sitio.