Grupos

Vicky Polard bota man de Verkami para se poder meter no estudio de gravación e gravar " o froito da súa demencia" (sic) en formato álbum. Recompensas divertidas e achegas desde cantidades modestas para lle botar un cabo á banda do Salnés co seu novo disco. 

Víctor Aneiros edita un novo disco, o séptimo da súa discografía oficial, e o bautiza co inequívoco título de A soidade pide copas nos bares. Edita, unha vez máis, o selo vasco Gaztelupeko Hotsak, que xa tén no seu catálogo cinco discos do músico de Ferrol. O traballo recolle versións acústicas dos 3 últimos discos do guitarrista, que cobran nova vida interpretados apenas por Aneiros e o acordeonista Fran Rey.

A banda eonaviega está inmersa nunha xira que os leva hoxe, martes 17, á Casa das Crechas de Compostela. Será ás 20:30h e de balde, presentando o seu novo disco, 'Alorias', que xa soou en Ovieu e na Veiga, en Asturias, e en Ribadeo a pasada fin de semana. 'Alorias' é un EP de 5 temas, onde Os Folkgazais recuncan no seu estilo, inspirado nas primeiras agrupacións que no occidente asturiano e na Mariña de Lugo achegaron os ritmos latinoamericanos aos torreiros das festas. Escoita 'Deixame ir contigo', un adianto do traballo.

Os Diplomáticos de Monte Alto están moi activos neste 2014. Co gallo dos 20 anos do Bravú a banda coruñesa espreguízase e volve apañar os trebellos de facer ruído. Estiveron no Festival de Cans, tocando no Jaliñeiro e presentando novo videoclip. Eis os vídeos que dan proba das dúas cousas. Medra o mar e faino con forza, xuntando Vigo e A Coruña nunha soa cidade atlántica e chegando, case, até o alto do Confurco.

Sacha na Horta, Ulträqäns estrearán disco nas vindeiras semanas. E van subindo adiantos dos seus respectivos traballos á rede. Velaquí a Cona Revolution das Sacha, o instrumental Mepirodáctilo de Ulträqäns. E de Bonus Track, o vídeo da gravación do tema Bye Bye de Chotokoeu en Maastrachit hai agora un ano. A canción entrará no vindeiro disco dos Chotoko, que publicarán aínda dentros duns meses. A beillar, que xa é venres e saíu o sol!!

Raiba e Xardín Desordenado están atrás de 2 novos proxectos na web de micromecenado Verkami. Trátase en ambos os casos do segundo disco das formacións. Raiba quere o apoio para masterizar e editar Versos da Revolta e Xardín Desordenado dedicará o diñeiro á gravación e edición de Aprendendo a ladrar. Desde apenas 4 ouros no caso dos metaleiros Raiba e desde 15 ouros para o combo jazzístico do Xardín Desordenado podes facer a túa achega e axudar a que estes dous interesantes proxectos cheguen a se realizar.

Utilizamos cookies

Utilizamos cookies no noso sitio web. Algunhas delas son esenciais para o funcionamento do sitio, mentres que outras axúdannos a mellorar este sitio e a experiencia do usuario (cookies de seguimento). Podes decidir por ti mesm@ se queres permitires o uso de cookies ou non. Ten en conta que, se as rexeitares, é posíbel que non poidas utilizar todas as funcións do sitio.